16 سالہ گھریلو ملازمہ قتل کیس، ملزم خواتین جوڈیشل ریمانڈ پر جیل منتقل ، وزیر انسانی حقوق نے نوٹس لے لیا
16 سالہ گھریلو ملازمہ قتل کیس، ملزم خواتین جوڈیشل ریمانڈ پر جیل منتقل ، وزیر انسانی حقوق نے نوٹس لے لیا
16 سالہ گھریلو ملازمہ کے قتل میں ملوث تین خواتین کو 14 روزہ جوڈیشل ریمانڈ پر جیل بھجوادیا گیا ہے۔ وفاقی وزیر برائے انسانی حقوق شیریں مزاری نے بھی سفاکانہ قتل کی واردات کا نوٹس لے لیا ہے۔
لاہور کے علاقے اقبال ٹاؤن میں 18 جنوری کو 16 سالہ گھریلو ملازمہ عظمیٰ کے قتل کی لرزہ خیز واردات ہوئی۔ ڈی ایس پی اقبال ٹاؤن عبدالغفور نے بتایا کہ لاہور کی رہائشی ماہ رخ کے گھر میں کام کرنے والی عظمیٰ نے مالکن کی بیٹی کی پلیٹ سے سالن لیا، جس پر ماہ رخ طیش میں آگئی اور سٹیل کا برتن اٹھا کر اس کے سر پر دے مارا، جس سے لڑکی کی موت واقع ہوگئی۔ایس پی انویسٹی گیشن شازیہ سرور کا کہنا ہے کہ ملزمان نے مقتولہ کی لاش نالے میں پھینکی اور چوری کا الزام کا لگا کر اس کے ورثاءکو بھی تھانے بلوالیا، ایک دن بعد لاش ملی تو گھناؤنے جرم کا پردہ چاک ہوگیا۔عظمیٰ کے اہلخانہ کے مطابق ان کی بیٹی پر پہلے بھی تشدد کیا جاتا رہا۔
سوشل میڈیا پر عظمیٰ کی ایک ویڈیو بھی وائرل ہوئی جس کے بارے میں کہا گیا کہ یہ عظمیٰ کی موت سے ایک دن پہلے کی ویڈیو ہے۔ اس ویڈیو میں 16 سالہ عظمیٰ تشدد کے بعد کسی بوڑھی عورت جیسی دکھائی دے رہی ہے۔ عظمیٰ مذکورہ گھر میں 8 ماہ سے ملازمہ کے طور پر کام کر رہی تھی۔ انچارج ہومی سائیڈ یونٹ اقبال ٹاﺅن سب انسپکٹر مراد رسول اور انچارج انویسٹی گیشن گلشن اقبال سب انسپکٹر صغیر احمد کی سربراہی میں پولیس ٹیم نے سی سی ٹی وی کیمروں اور موبائل فون کی CDR حاصل کر کے ملزمان کو ٹریس کیا اور 3 سفاک ملزمان مسماة ماہ رخ، ائمہ اورریحانہ بی بی کو گرفتارکر لیا۔
ملزمان کو عدالت میں پیش کر کے دو روزہ جسمانی ریمانڈ حاصل کیا گیا جس کے بعد 25 جنوری کو تینوں ملزم خواتین کو پولیس کی جانب سے عدالت میں پیش کیا گیا۔ ڈیوٹی جج اشفاق احمد نے ملزمان ماہ رخ ، آئمہ اور ریحانہ کو جوڈیشل ریمانڈ پر 14 روز کے لیے جیل بھیجنے کا حکم دے دیا۔
دوسری جانب گھریلو ملازمہ کے سفاکانہ قتل پر سوشل میڈیا پر انصاف کیلئے مہم بھی شروع ہوئی جس کے نتیجے میں وفاقی وزیر برائے انسانی حقوق ڈاکٹر شیریں مزاری نے واقع کا نوٹس لے لیا۔
Comments
Post a Comment